《香港人,唔該理智同爭氣少少啦!》
香港人,唔該理智同爭氣少少啦!

  我喺嚟緊嘅日子應該會好少出散文,除咗係忙緊參與地區事務外,主要係對香港嘅網絡生態失望,索性專注於寫小說投稿去台灣算。

  本來仲以為香港人經歷咗雨傘之後,會開始關心下政治同身邊嘅人,點知道社運熱潮一過,就專注返啲八婆嘢,成版FB都見啲人嘈埋啲雞毛蒜皮嘅事。港男港女仍舊互相標籤同嫌棄,明明自己條件已經唔好,就無諗過包容對方團結起嚟反赤化。班所謂兩性專家就一係矯情,一係刻薄,為咗吸納信徒拗人氣就鼓吹埋啲極端思想,講埋啲嘢不切實際,但偏偏啲人無經歷過就信到十足。

  FB嘅過濾制度又戇鳩鳩,搞到而家一日嘔到幾篇嘅九唔搭八低質文/片橫行,一係就作埋啲假嘢嘩眾取寵先多人睇,一係就搵班打手吹到上天、埋堆拜大佬圍威喂,奇怪在香港人日日屌官商勾結、啲人靠擦鞋拉關係上位,但自己又支持緊類似嘅嘢。真係有反思性嘅嘢就睇唔撚到,而家仲要整埋啲乜柒「搶先看」,搞到惡性循環。

  就算係仲關心時事嗰班,十個有九個係鍵盤戰士,剩係識上高登開POST大叫「黑警死全家」。到真係有行動要吹大雞,畀個正評或者FB JOIN咗EVENT就當自己參與咗件事,每次落到去來來去去都係嗰幾個臉孔。已經唔指望個個可以犧牲小我走去衝擊喇,叫佢哋做下義工、捐下錢,又或者出嚟行行企企助威都扮忙笠晒水。到件事完咗之後就馬後炮指點江山,無落過場睇下個實際環境係點,剩係識企喺道德高地屌鳩人做唔到嘢,又唔諗下現實有乜制肘。無成效就扮一早看透世事所以唔理,有成效就衝出嚟邀功講到自己有份策劃咁款。

  同佢哋講真話、叫佢哋面對缺點又扮聽唔到,柒咗又唔肯認錯、唔識反省,剩係聽啲自己想聽嘅嘢,畀藉口自己唔去行動,對住啲左膠理論圍爐取暖,打晒飛機當正自己係民主鬥士,見到有異見者就剩係識標籤同抹黑。默默耕耘做實事就無人理,網上噏幾句大路嘢就畀人當係神咁拜,敢言嘅人就畀人杯葛,要埋沒良心不斷餵人食糖衣毒藥先紅得起。

  仲有班毒撚把口話支持民主,到班空姐爭取權益時就屌佢哋係飛雞唔抵幫,恨女恨到痴撚咗線,一係就叫窮人唔好生仔,奴性嘅思維表露無遺。《魚蛋論》上晒腦,好似我捱慣麥記,你飲下Starbucks就罪孽,共產黨未搞分化自己已經鬼打鬼。為民主犧牲少少利益都唔肯,根本就唔係想改革個制度,只係想自己向上流,骨子裡同班自私嘅藍絲無分別。可能有啲港豬唔係裝睡,而係一早就知班香港人無撚得救同唔值得救,幫拖都廢撚事,疊埋心水搵錢做離地中產或移民算。

  不過點都好,小弟都會盡量捱到最後一刻,就算唔出文,都會定期發佈下有用嘅資訊,狙擊下班狗官。香港人,唔該理智同爭氣少少啦!

Facebook文章

Share