《如果你班鍵盤戰士仲有良知,好應該幫下傘兵搞區選》
如果你班鍵盤戰士仲有良知,好應該幫下傘兵搞區選

首先,我只係屌班無出過嚟幫手嘅鍵盤戰士,我知道係有網民言出必行、勞心勞力,但比數仲係唔多。

唔好成日話港豬無得救、代議士無效、區議會無用, 好多中間游離票係睇返個候選人做唔做到嘢、聲勢夠唔夠大,光環同理念唔係大晒。

雨革之所以爆發,主要都係建制肆虐,而泛民咁多年嚟做唔到嘢甚至幫手出賣香港,我哋唔係更加需要取代佢哋咩? 代議士唔係無用,一個區議員表面上好似做街坊打雜, 但當你有權力、有資源,就可以多啲機會向市民解釋政府有幾濕鳩、個制度有乜問題、激進行動存在嘅價值、灌輸下一代正確政治觀。

就算你唔指望屋企人陪你一齊衝鋒陷陣,都唔想佢日日屌你搞事唔生性,唔想佢趕你出街呀嘛! 同埋每個區都有一億由區議會決定點用係社區建設度,唔通全港性制度就重要,但居住環境係點就唔重要?唔通你想到時區區都有林村天安門呢啲無撚用嘅大白象工程而唔係用返喺市民度,又或者祥華嘅天價工程夾硬通過? 同埋區議會有議席,無論形象同資源上都可以捧到本土派入立法會,阻止建制派繼續賣港,同泛民呢啲潛在二五仔。

有啲人成日都話我唔知個候選人信唔信得過,驚幫錯人, 既然你信唔過人,點解當初你唔出嚟選?人哋咁辛苦做足成年嘢無錢收,你間唔中幫下手搬搬抬抬都唔肯?少少付出都唔肯,學人爭取民主? 如果你話最近你嘅傘兵真係好鬼,可能誠信有問題、可能收過錢搞搞震、可能懶到HIHI想靠民主光環偷雞多、可能好明顯已經投左共或鴿, Fine,我都唔建議幫呢啲人,但隔籬區就無信得過嘅傘兵?你唔知人咩料就自己親身去摸索。 唔好再畀自己咁多藉口,上網點樣抽水、鬧政府,對現實嘅幫助始終唔大。好多選民唔上網、選擇性吸取資訊,你仲唔落去做下實事,唔通真係以為鍵盤可以建國、可以打倒共產黨?定係以為嘈下交、呃完Like就已經係大智者、對社運好有貢獻?

今次本土派贏到幾多議席,主宰香港嚟緊四年嘅命脈,今個星期六同日,打少陣機、行少陣街,主動聯絡候選人,當係為香港盡一分力,話唔定你嘅出現就係拉到致勝票源嘅關鍵。

Facebook文章

Share